JUANA PARADA

Xerente de ORPAGU. Ribeira, A Coruña.

As Organizacións de Produtores, coma OPROMAR ou ORPAGU, son entidades que engloban diferentes empresas armadoras que posúen barcos de pesca. Os seus labores son variados, dende a representación da súa flota ante organismos pesqueiros nacionais e internacionais ata a innovación e modernización do sector.

Juana leva en ORPAGU moitos anos, pero se ben veu ó mundo en familia de mariñeiros, a súa orientación educativa estivo máis relacionada co mundo empresarial no ámbito da administración, contabilidade e xestión de recursos humanos. A casualidade quixo que acabase profesionalmente nesta organización, xa que foi a través dun anuncio no periódico como soubo que buscaban alguén que se ocupase de recursos humanos e xestionase as tripulacións dos barcos asociados.

Comezou nese ámbito, pero a súa xuventude, unida ó seu carácter de Brava do Mar, propiciou que destacase e fose adquirindo novas competencias ata que chegou á xerencia da entidade, sempre coa confianza plena dos armadores ós que representa.

A súa mirada brilla cando explica que lle encanta o que fai, que é unha afortunada por traballar onde traballa, sen monotonía, con retos constantes, e que lle permite coñecer moita xente e aprender cada día. É consciente de que é un traballo esixente, que implica estar ó día en moitos ámbitos, xa que a pesca vese afectada por moitas vertentes, dende a lexislativa ata a biolóxica, pasando pola política ou a sanitaria, e a satisfacción de levalo a cabo lese na súa cara.

Recoñece que naceu no momento axeitado para que ser muller non fose un problema á hora de ascender na súa profesión, xa que en xeracións anteriores seguramente non sucedería. Aínda así, os comezos foron se non duros, si incómodos, sendo a única muller en moitas das reunións ás que acudía. Pero grazas ó feito de representar a un colectivo forte que confiou plenamente nela, sente que hoxe ten un lugar. Non obstante, ten ese lugar grazas ó seu esforzo e á súa bravura.

É consciente tamén da importancia do traballo en equipo e asegura  que “non hai líderes bos se non hai un bo equipo detrás”.

Como muller sente que ten unha vantaxe competitiva, xa que historicamente elas asumían a xestión da casa, da familia, do traballo e das súas vidas facendo unha xestión multidisciplinar simultánea que agora poden aplicar no ámbito laboral, e está convencida de que a eles lles custa máis.

O seu maior logro foi que ORPAGU pasase de ser unha mera xestora de barcos e empresas a ser unha entidade innovadora que abriu portas sen explorar antes, coma a comercialización ou a creación de novos produtos.